Kryeministri Edi Rama ishte i pranishëm në ceremoninë solemne ku u dhuruan titujt “Doctor Honoris Causa” për personalitete të njohura ndërkombëtare.
Në fjalën e tij, ai përqendroi vëmendjen tek profesor Ricardo Hausmann, duke përshkruar se si njohja e këtij ekonomisti të shquar ka pasur një fillim të vështirë dhe si ky proces ka lidhur historinë e tij personale me sfidat e karrierës politike dhe të angazhimit në shërbim të vendit.
“Kjo është një platformë globale që mbledh njerëz të spikatur të botës së ligjit nga të gjitha kontinentet. Sot u thirra këtu për të folur për profesor Ricardo Hausmann dhe për të kërkuar që ai të nderohej me titullin “Honoris Causa”. Për mua kjo ishte një provë e vërtetë, sepse marrëdhënia ime me Ricardon filloi si një dështim total. I shkrova kur isha në opozitë, për të bindur se Shqipëria ia vlente vëmendjes së tij, dhe në fillim mora heshtje. Kuptova se për të fituar vëmendjen e tij, duhej të fitonim zgjedhjet”, tha Rama.
