Derbi i kryeqytetit mes Partizanit dhe Dinamos përfundoi këtë të shtunë me triumfin e të kuqve 2-1 në “Arenën e Demave”. Ndeshja kishte karakter më simbolik sesa ndikim në renditjen përfundimtare, pasi të dyja skuadrat kishin vendosur fatin e tyre përpara takimit.
Atmosfera në stadium ishte më e qetë se zakonisht, me tribunat dukshëm më të zbrazëta. Grupimi “Ultras Guerrils” vendosi të bojkotojë ndeshjen, ndërsa tifozët e tjerë dhe disa turistë të huaj tentuan të sjellin pak gjallëri në shkallët e stadiumit.
Të dy trajnerët shfrytëzuan rastin për të aktivizuar lojtarë që kishin marrë më pak minuta gjatë sezonit, duke sjellë edhe disa debutime. Një tjetër veçori e këtij derbi ishte arbitrazhi, i besuar një tresheje femrash, me Emanuela Rustën si kryesore, ndërsa disa nga lojtarët kryesorë të të dyja skuadrave ndoqën ndeshjen nga tribuna VIP.
Në fund të sfidës, duke qenë ndeshja e fundit e sezonit të rregullt, lojtarët e të dyja ekipeve ndërruan fanellat me njëri-tjetrin, duke përmbyllur kampionatin me sportivitet.
