Dinamo po vijon përgatitjet për sfidën e së dielës ndaj Elbasanit në garën për “Final 4”, me synimin për një tjetër fitore që do të mbajë gjallë shpresat për titullin kampion, duke pritur edhe rezultatin e Egnatias ndaj Vllaznisë.
Trajneri Daja ka lajme të mira nga kampi blu, me rikuperimin e Andre Teikseira dhe Klevi Qefalisë, të cilët kanë lënë pas dëmtimet dhe janë stërvitur me pjesën tjetër të skuadrës. Teikseira mungoi për rreth një muaj, duke humbur finalen e Kupës dhe javët e fundit të kampionatit, ndërsa Qefalia ka pasur shqetësime në mesfushë.
Ndërsa portieri Aldo Teqja rikthehet pas mungesës, duke u stërvitur normalisht dhe duke e shtuar konkurrencën për portën. Megjithatë, gjendja e tij do të vlerësohet ditët në vijim për të vendosur nëse do të startojë nga stoli apo do të aktivizohet në ndeshje.
