Rusia tha të hënën se do të pezullojë ose ndërpresë marrëveshjet për furnizimin me naftë dhe gaz të lirë të vendit të Kaukazit Jugor nëse ky vend vazhdon me përpjekjen e tij për t’u anëtarësuar në Bashkimin Evropian.
Moska e lëshoi paralajmërimin dy javë para zgjedhjeve armene më 7 qershor, me sondazhet e opinionit që i japin një epërsi të konsiderueshme partisë “Kontrata Politike” të kryeministrit Nikol Pashinyan, e cila ka krijuar një marrëdhënie më të ngrohtë me Perëndimin, duke e bezdisur Moskën.
“Ambasada ruse dërgoi zyrtarisht një letër… ku thuhej se nëse procesi i pranimit në BE vazhdon, pala ruse do të pezullojë ose do ta ndërpresë në mënyrë të njëanshme Marrëveshjen e Bashkëpunimit për Furnizimin me Gaz Natyror, Produkte të Naftës dhe Diamante të Përpunuara”, tha Maria Zakharova, zëdhënëse e Ministrisë së Jashtme ruse.
Armenia, një vend pa dalje në det me rreth 3 milionë banorë, tradicionalisht ka pasur lidhje të ngushta me Rusinë. Ajo strehon baza ushtarake ruse dhe mbështetet shumë në importet ruse të energjisë. Vitin e kaluar importoi 2.7 miliardë metra kub (bcm) gaz natyror, 82 përqind e të cilit erdhi nga Rusia, sipas agjencisë së lajmeve Interfax.
Por marrëdhëniet me Moskën janë përkeqësuar vitet e fundit, ndërsa Jerevani kërkon të thellojë lidhjet e tij me Brukselin dhe Uashingtonin.
Moska më parë këtë muaj akuzoi Armeninë se është tërhequr në atë që e quajti “trajektore anti-ruse” e BE-së. Dje, të martën, Sekretari i Shtetit i SHBA-së, Marco Rubio, dhe homologu i tij armen, Ararat Mirzoyan, nënshkruan një marrëveshje partneriteti strategjik në kryeqytetin armen.
