Pakistani po intensifikon përpjekjet diplomatike për të ndihmuar në uljen e tensioneve mes SHBA-së dhe Iranit, në një kohë kur negociatat për një marrëveshje të mundshme vazhdojnë ende.
Ministri i Jashtëm i Pakistanit, Ishaq Dar, ndodhet në Uashington, ku pritet të takohet me sekretarin amerikan të Shtetit, Marco Rubio. Takimi do të fokusohet në marrëdhëniet dypalëshe dhe zhvillimet rajonale, përfshirë edhe bisedimet SHBA–Iran.
Sipas Ministrisë së Jashtme të Pakistanit, qëllimi është ruajtja e kanaleve të dialogut dhe shmangia e përshkallëzimit të konfliktit.
“Wall Street Journal” raportoi se bisedimet mes SHBA-së dhe Iranit po vijojnë pavarësisht tensioneve të fundit, duke sinjalizuar interes të dyanshëm për uljen e përplasjeve.
Zëvendëspresidenti amerikan JD Vance tha se nuk ka ende një marrëveshje përfundimtare, por palët janë pranë një dakordësie, duke theksuar se çështjet kryesore lidhen me programin bërthamor iranian.
Presidenti Donald Trump deklaroi se preferon një marrëveshje, por “të gjitha opsionet mbeten të hapura”.
Ndërkohë, Irani ka theksuar se nuk do të pranojë kushte që cenojnë interesat e tij kombëtare.
Sipas burimeve pranë negociatave, po diskutohet një draft që parashikon zgjatjen e armëpushimit për 60 ditë dhe rifillimin e lundrimit në Ngushticën e Hormuzit.
