Sporti shqiptar është në zi pas ndarjes nga jeta të një prej figurave më të njohura të volejbollit për femra, ish-trajnerit të Dinamos, Kreshnik Tartari, i cili u nda nga jeta në moshën 83-vjeçare.
Tartari konsiderohet si një nga trajnerët më të suksesshëm në historinë e volejbollit shqiptar për femra, duke ndërtuar breza të tërë sportistesh që dominuan kampionatin vendas dhe arritën rezultate të rëndësishme edhe në arenën ndërkombëtare, ku Dinamo u rendit dy herë mes katër skuadrave më të mira të Europës.
Nën drejtimin e tij, ekipi i femrave të Dinamos u kthye në një forcë dominuese të sportit shqiptar, duke fituar 11 tituj kampionë radhazi dhe 20 në total, duke nisur nga viti 1974.
I lindur në Tiranë më 21 korrik 1943, Tartari ka dhënë kontribut të rëndësishëm si volejbollist, trajner dhe drejtues sportiv, si në klub ashtu edhe në ekipin kombëtar. Për kontributin e tij ai është nderuar me titullin “Mjeshtër i Madh”.
