Turqia dhe Kanadaja kanë rënë dakord të nisin diskutimet për një marrëveshje të tregtisë së lirë, me qëllim forcimin e mëtejshëm të marrëdhënieve ekonomike dhe investimeve mes dy vendeve.
Lajmi u bë i ditur përmes një deklarate të përbashkët nga ministritë e tregtisë së Turqisë dhe Kanadasë, pas një takimi mes ministrave Omer Bolat dhe Maninder Sidhu. Sipas deklaratës, palët theksuan angazhimin për të thelluar bashkëpunimin ekonomik dhe për të shfrytëzuar potencialin e plotë të partneritetit dypalësh.
“Duke u bazuar në telefonatën e fundit midis Kryeministrit Mark Carney dhe Presidentit Recep Tayyip Erdogan, ministrat riafirmuan angazhimin e tyre të përbashkët për të thelluar marrëdhëniet tregtare dhe të investimeve Kanada-Turqi,” thuhet në deklaratë.
Po ashtu, të dy palët mirëpritën zgjerimin e Marrëveshjes së Transportit Ajror, e cila pritet të forcojë lidhjet mes dy vendeve dhe të krijojë mundësi të reja për bizneset, eksportuesit dhe udhëtarët. “Lidhjet e përmirësuara ajrore do të mbështesin lidhje më të forta tregtare dhe do t’i afrojnë ekonomitë tona,” theksohet më tej.
Sipas autoriteteve, ky hap synon të rrisë bashkëpunimin ekonomik dhe të hapë rrugë të reja për tregtinë dhe investimet mes Turqisë dhe Kanadasë.
