Kryetari i Partisë Demokratike, Sali Berisha, gjatë një bashkëbisedimi të zhvilluar në rrjetet sociale me qytetarët, ka shprehur mirënjohje për mbështetjen që, sipas tij, i është dhënë përgjatë viteve të fundit.
Ai u ndal edhe te procesi që e quajti betejë pesëvjeçare lidhur me sanksionet e vendosura nga administrata e mëparshme amerikane, duke theksuar se kjo periudhë ka kërkuar kurajë dhe qëndrueshmëri nga mbështetësit e tij.
“Qytetare dhe qytetarë, demokrate e demokratë që ndiqni këtë bisedë, përsëri një mirënjohje të pakufishme ndaj jush për mbështetjen, kurajën, guximin që dëshmuat këto pesë vite në mbështetje të kauzës që unë mbrojta.
Të Sali Berishës dhe betejës së tij për dinjitetin njerëzor.
Unë dua t’u garantoj ju, t’u siguroj secilin prej jush se unë ndërmora këtë betejë më të vështirën e jetës sime në disa aspekte, por e ndërmora atë për të mbrojtur si dinjitetin tim, dhe dinjitetin e atyre miliona shqiptarëve, të cilët në dekada kishin votuar Sali Berishën më shumë se çdo politikan tjetër të këtij vendi.
Në këtë kuadër unë besoj se bëra detyrën time si njëri prej jush.
Dhe për ta mbyllur këtë, duke falënderuar edhe njëherë përzemërsisht administratën e presidentit Trump dhe sekretarin Rubio për korrigjimin që i bënë një vendimi fund e krye të padrejtë, u ftoj të mobilizojmë të gjithë energjitë tona, të bashkohemi në misionin tonë të madh, rikthimin e votës së lirë të shqiptarëve dhe të ardhmes së merituar për Shqipërinë dhe shqiptarët”, deklaroi Berisha.
