Një gjykatë në Oslo të Suedisë ka dënuar Marius Borg Hoiby, 29 vjeç, djalin e Princeshës norvegjeze Mette-Marit, me katër vjet burg për dy akuza për përdhunim dhe akuza të tjera në një rast që ka dëmtuar ndjeshëm imazhin e monarkisë norvegjeze.
Hoiby, djali i Mette-Marit nga një marrëdhënie para martesës së saj në vitin 2001 me Princin Haakon, u përball me një total prej 40 akuzash , me një dënim maksimal prej 16 vjetësh burg.
Akuzat dhe dënimi
Një nga përdhunimet për të cilat Hoiby u dënua ndodhi në vitin 2018 në rezidencën zyrtare të çiftit mbretëror.
Hoiby, i cili nuk është zyrtarisht anëtar i familjes mbretërore dhe nuk kishte një punë të qëndrueshme, u lirua nga dy përdhunime të tjera, ndërsa u dënua për dhunë të përsëritur në familje kundër një ish-partnereje, shkelje të rregullave të trafikut, kërcënime dhe vepra të tjera penale. Prokuroria kishte kërkuar një dënim me shtatë vjet burg.
Ai kishte mohuar akuzat më të rënda, duke përfshirë përdhunimet që prokuroria pretendonte se ndodhën ndërsa viktimat ishin në gjumë ose pa ndjenja, dhe dhunën në familje. Mbrojtja e tij kishte kërkuar një dënim prej 18 muajsh për akuzat e mbetura për të cilat ai u deklarua fajtor, duke përfshirë transportimin e 3.5 kilogramëve marihuanë, sulm fizik dhe kërcënime.
Hoibi, i cili ka qenë në paraburgim që nga 1 shkurti, nuk mori pjesë personalisht në gjyq për arsye mjekësore, por u paraqit nëpërmjet videokonferencës. E vetmja viktimë e përdhunimit e pranishme në sallën e gjyqit shpërtheu në lot ndërsa gjyqtari shpalli vendimin.
Jeta në tepri
Gjyqi, i cili u zhvillua nga 3 shkurti deri më 19 mars, zbuloi jetën e Hoiby-t , i cili u vu në qendër të vëmendjes në moshën tre vjeç për shkak të aferës së nënës së tij me Princin e Kurorës Haakon .
“Unë njihem kryesisht si djali i nënës sime dhe asgjë tjetër. Kjo është arsyeja pse gjithmonë kam pasur një nevojë ekstreme për njohje”, i tha ai gjykatës.
Në total, përdhunimet për të cilat u akuzua, përfshirë një në shtëpinë e çiftit, ndodhën midis viteve 2018 dhe 2024, pas festave gjatë të cilave ai tha se konsumonte alkool dhe drogë.
Në argumentet e tij përfundimtare, prokurori e përshkroi Hoiby-n si “një burrë që beson se mund të bëjë çfarë të dojë”. Pavarësisht shpjegimeve konfuze dhe gabimeve në kujtesë, ai këmbënguli se nuk kishte kryer marrëdhënie seksuale me gra që flinin.
Hoiby gjithashtu akuzoi median se e portretizonin atë si një “përbindësh “, duke e bërë atë “një shënjestër urrejtjeje në të gjithë Norvegjinë”.
