Kryetari i Partisë Demokratike, Sali Berisha, ka komentuar takimin e zhvilluar në Pallatin Elysee mes kryeministrit Edi Rama dhe presidentit francez Emmanuel Macron, duke kritikuar deklaratat e kryeministrit shqiptar dhe mënyrën se si ai i ka paraqitur kundërshtarët politikë dhe protestuesit.
Berisha i cilësoi disa nga pretendimet e Ramës si të pabaza dhe i interpretoi si pjesë të një retorike politike të ekzagjeruar.
“Presidenti Macron ta kishte të qartë se balozët e zinj, që ai i quan algoritmet e shtojzovalleve dhe shtrigave, që i konsideron blogerë e influencerë, janë të gjitha fantazi e sëmurë e një njeriu të lidhur me pushtetin më keq se mishi me thoin, për shkak të krimeve të tij të panumërta dhe që nuk pranon ta depozitojë atë, por bën gjithçka për të shpëtuar lëkurën e tij. Uroj që ky takim në Élysée të bëjë që Rama të marrë mesazhin e duhur në interesin më të mirë të Shqipërisë, rajonit dhe miqve të Shqipërisë, pasi Macron e ka ftuar atë si një mik të Francës”, u shpreh Sali Berisha.
