Dy automjete janë përfshirë nga flakët gjatë natës në Elbasan, duke shkaktuar dëme të konsiderueshme materiale, ndërsa autoritetet kanë nisur hetimet për zbardhjen e shkaqeve të ngjarjes.
Sipas informacioneve paraprake, zjarri ka dëmtuar pjesërisht një automjet tip Audi, ndërsa një Volkswagen është shkrumbuar plotësisht.
Të dy mjetet rezultojnë në pronësi të të njëjtit person.
Menjëherë në vendngjarje kanë ndërhyrë shërbimet zjarrfikëse dhe policia, të cilat kanë bërë të mundur shuarjen e flakëve dhe izolimin e zonës.
Nuk raportohet për persona të lënduar, ndërsa grupi hetimor po punon për të përcaktuar nëse zjarri ka qenë aksidental apo i qëllimshëm, si dhe po verifikon pamjet e kamerave të sigurisë në zonë.
