Kryeministri i Kosovës Albin Kurti ka insistuar se ka rezerva dhe i ka ftuar qytetarët të mos përfshihen nga paniku. Ai u ka bërë thirrje qytetarëve që kanë blerë më tepër miell se që ju duhet, që ta çojnë atë nëpër furra.
“Ka rezerva e rrjedhimisht nuk ka vend për panik. I ftoj qytetarët që të ndjehen të sigurt siç është edhe situata në vendin tonë. Unë i takova përfaqësuesit te Shoqatës së Mullixhinjve e më siguruan se në Kosovë edhe për dy muaj ka grurë që ende nuk është bluar e në muajin e kaluar kanë bluar grurë për tre muaj. Pra ka grurë 3 muaj plus dy muaj. Qytetarët që kanë blerë më shumë se që ju nevojitet ta çojnë miellin në furrë”, tha Kurti në konferencë për media.
Kurti ka folur edhe sa i përket vendimit të Serbisë për të ndaluar eksportin e grurit e miellit ndër të tjera.
“Asnjë kilogram miell nuk përdoret që ka ardhur nga Rusia e Ukraina. Çmimi i grurit në bursën ndërkombëtare është duke u rritur për shkak të luftës, por nuk jemi furnizuar prej atje. Me ministrin Faton Peci, ministren Rozeta Hajdari, do të bëjmë më të mirën përballë sfidave që do të ndodhemi. Ajo që do të angazhohemi është për një inspektorat. Nuk ka vend për panik e nuk kemi varësi ekzistenciale nga Serbia”, tha Kurti.
