Në Serbi shqiptarët do të përfaqësohen vetëm me një deputet. Këto janë rezultatet e përcaktuara në bazë të gati 15 për qind të votave të përpunuara.
Koalicioni i Shqiptarëve për Luginën i Shaip Kamberit aktualisht ka 0.45 për qind apo 1 ulëse. Kamberi pritet të jetë sërish zë i shqiptarëve në parlamentin serb.
Alternativa për Ndryshim e Shqiprim Arifit për momentin ka 0.22 për qind, gjë që rezulton me zero ulëse në Kuvendin e Serbisë.
Rreth 6 mijë shqiptarëve në Serbi u është mohuar e drejta e votës në zgjedhjet e përgjithshme serbe, përçka edhe Presidentja e Republikës së Kosovës, Vjosa Osmani, i bëri thirrje komunitetit ndërkombëtar të dënojë këtë akt të shtetit autoritar të Serbisë.
Presidentja Osmani tha se një veprim i tillë i Serbisë është rezultat i fushatës së qëllimshme të Serbisë për spastrim etnik të shqiptarëve përmes metodave të tyre të vazhdueshme administrative.
Presidenti i Serbisë, Aleksandër Vuçiç tha se ka fituar 59.9% të votave në zgjedhjet presidenciale.
