Më shumë se 900 trupa të pajetë civilësh janë zbuluar në rajonin përreth kryeqytetit ukrainas pas tërheqjes së forcave ruse, shumica e të cilëve u qëlluan për vdekje, ka bërë të ditur policia vendase.
Ky është dyfishi i numrit të deklaruar dy javë më parë nga autoritetet ukrainase. Ministria e mbrojtjes e Rusisë u zotua të shtonte sulmet me raketa në Kiev në përgjigje të agresionit të supozuar të Ukrainës në territorin rus.
Deklarata e tyre kërcënuese erdhi pas fundosjes së luftanijes së Moskës në Detin e Zi, për të cilën një zyrtar i lartë i mbrojtjes amerikane tha të premten se ishte goditur nga të paktën një raketë ukrainase.
Andriy Nebytov, kreu i forcës rajonale të policisë së Kievit, tha se rreth Kievit, kufomat braktiseshin në rrugë ose varroseshin përkohësisht. Ai citoi të dhënat e policisë që tregojnë se 95% e qytetarëve kishin vdekur nga plagët me armë zjarri.
Shumë trupa gjenden të pajetë çdo ditë, nën rrënoja dhe në varre masive, tha zyrtari.
Numri më i madh i viktimave u gjet në Bucha.
Sipas Nebytov, punonjësit e shërbimeve komunale në Bucha mblodhën dhe varrosën kufomat në periferi të Kievit edhe pse zona ishte nën kontrollin rus. Ai tha se trupat ruse “po gjurmonin” njerëzit që shprehnin pikëpamje të forta pro-ukrainase.
