Babai i 31-vjeçarit, Ilvi Meta që policia e Kavajës deklaroi se u vetëvra pasditen e sotme brenda në komisariat akuzon efektivët se i dhunuan të birin dhe në fund “u mbeti në dorë”.
Agim Meta rrëfeu për mediat si e mësoi lajmin tragjik. Ai tha se shkoi në komisariat për të parë të birin, por policia e kishte nxjerrë jashtë.
“Lajm shumë i hidhur. Shumë i hidhur. Isha në punë kur e mora vesh. Kur erdha pasdite, tek lajmet e dëgjova. Nga televizori. E morën këta vesh përpara meje.
Kur shkova në polici, nuk më pranoi fare. “Ik se i dimë vetë punët” më thanë. Këta kanë gjetur pretekst se ka varur veten. U thash dua të shoh fëmijën.
Kjo ishte hera e parë që shkonte në polici. Policia ishte problem, jo ai. Nuk ka shtet dhe polici. Kërkova të hyj në polici të shikoj fëmijën tim. Fëmijën ma vranë. Nuk e di si ka dalë autopsia.
Kohët e fundit, djali ishte në Kavajë dhe shkonte në Greqi cdo tre muaj dhe punonte” deklaroi Agim Meta. Për ngjarjen deri tani janë arrestuar tre efektivë policie.
