Eno Bozdo, nga Komisioni i Rithemelimit, ka reaguar pas propozimit një ditë më parë të një platforme nga Enkelejd Alibeaj për presidentin e ri, sipas të cilit ato ishin mendime të grupit të PD.
Por për Bozdon nuk është aspak kështu. Në një status në Facebook, ai shkruan se dokumenti i shpërndarë në emër të grupit të PD, nuk është gjë tjetër veçse disa kritere të Ramës, të vendosura në gojën e atyre që jo vetëm nuk përfaqësojnë PD.
“Nuk mund të ketë propozime të asnjë deputeti të veçantë në emër të PD, sepse këtë tagër e ka vetëm Këshilli Kombëtar i Partisë Demokratike. Rezoluta e miratuar prej tij e përcakton qartë këtë fakt!
Dokumenti i shpërndarë dje në “emër të grupit parlamentar të PD”, nuk është gjë tjetër veçse disa kritere të Ramës, të vendosura në gojën e atyre që jo vetëm nuk përfaqësojnë PD, por që kërkojnë që kështu zgjedhjen e presidentit t’ia lënë më dorë totalisht Ramës!
Rama nga ana e tij do deklarojë që zgjedhje ishte “konsensuale” me opozitën! Një skenar i turpshëm dhe bajat.
Është një skenar i tillë sepse synon një opozitë vasale, të kapur, të papërgjegjshme, në kurndërshtim me interesat e shqiptarëve! Kjo kohë ka mbaruar!
PD sot përfaqëson rezistencën politike dhe qytetare ndaj qeverisjes më të korruptuar në Evropë! Si e tillë ajo do të mbrojë vetëm interesat e Shqipërisë dhe shqiptarëve, dhe jo të Ramës dhe të shiturve tek ai!”