Finlanda “duhet të dijë përgjegjësinë dhe pasojat” e anëtarësimit në NATO, tha Ministria e Jashtme ruse në një deklaratë të enjten, duke shtuar se Rusia “do të detyrohet” të hakmerret nëse vendi bashkohet me aleancën.
“Deklarata e presidentit finlandez Niinisto dhe kryeministrit finlandez Marin, të cilët folën sot në favor të anëtarësimit të Finlandës në NATO, është një ndryshim rrënjësor në politikën e jashtme të vendit”, tha Ministria e Jashtme ruse.
Anëtarësimi i mundshëm i Finlandës në NATO do të shkaktonte dëme serioze në marrëdhëniet dypalëshe Rusi-Finlandë, të cilat ruajnë stabilitetin dhe sigurinë në rajonin e Evropës Veriore, tha ministria.
Ministri i Jashtëm finlandez Peka Haavisto këmbënguli se pranimi i Finlandës dhe Suedisë në aleancën ushtarake nuk do të kërcënonte Rusinë, duke shtuar: “Ne jemi vende që e duam paqen”.
“Rusia nuk duhet të ndihet e kërcënuar nga pranimi i Finlandës dhe Suedisë në NATO – ne jemi vende paqësore, ne kemi ruajtur një kufi paqësor me Rusinë dhe ne shikojmë nga e ardhmja kur bashkëpunimi normal me Rusinë mund të vazhdojë”, tha ai.
Kancelari gjerman Olaf Solz shkroi në Twitter se mbështet lëvizjen e Finlandës për t’iu bashkuar NATO-s sot, duke thënë se kishte folur me presidentin finlandez.
“Unë mirëpres vendimin e Finlandës për anëtarësimin e vendit në NATO pa vonesë. Në një bisedë telefonike me presidentin Niinisto, e sigurova për mbështetjen e plotë të qeverisë federale”.
Ministrat e Jashtëm të G7 (Francë, Gjermani, SHBA, Japoni, Itali, Kanada, MB) po takohen në Ostholsteintë Schleswig-Holstein, në bregun e Detit Baltik, nga sot deri të shtunën.
Departamenti Amerikan i Shtetit ka njoftuar se Anthony Blinken do të udhëtojë në Evropë të shtunën për një takim jozyrtar të ministrave të jashtëm të NATO-s.
