Bashkimi Evropian ka njoftuar një paketë prej 500 milionë euro të tjera për Ukrainën, që të blejë armë të rënda në luftën e saj kundër Rusisë.
Lajmi u bë i ditur shefi i marrëdhënieve të jashtme të bllokut në një mbledhje të G7-ës.
“Ne do të ofrojmë një këst të ri prej 500 milionë eurosh më shumë për të mbështetur ushtrinë e Ukrainës. Do të jetë rreth dy miliardë euro në total”, u tha Josep Borrell gazetarëve të premten në Ëeissenhaus, në bregun gjerman të Detit Baltik.
Fondet do të ndahen për blerjen e armëve të rënda dhe do të çojnë mbështetjen financiare totale të BE-së për Ukrainën në 2 miliardë euro.
Në takim po marrin pjesë edhe diplomatë të lartë nga Gjermania, Mbretëria e Bashkuar, Kanadaja, Franca, Italia, Japonia dhe Shtetet e Bashkuara.
Diplomatët e BE-së kanë planifikuar gjithashtu të zhvillojnë bisedime të hënën mbi një embargo të mundshme ndaj naftës ruse.
Hungaria e ka refuzuar masën për shkak të varësisë së saj të madhe nga importet ruse, por Borrell shprehu optimizëm se do të kishte një marrëveshje.
“Jam i sigurt se do të kemi një marrëveshje – na duhet kjo marrëveshje dhe do ta kemi. Sepse ne duhet të heqim qafe varësinë e naftës nga Rusia”, tha Borrell.
