Qeveria e Hungarisë ka shpallur gjendjen e jashtëzakonshme për shkak të pasigurisë nga lufta në Ukrainë.
Vendimi hyn në fuqi nga kjo e mërkurë dhe sipas kryeministrit të vendit Viktor Orban do të sjellë zbatimin e një pakete të posacme ligjore siç ka ndodhur edhe më parë, një herë për shkak të krizës së migracionit në Evropë dhe më vonë gjatë pandemisë COVID-19. Gjendja e re e jashtëzakonshme fuqizon në mënyrë të ngjashme qeverinë e Orbanit të miratojë masa emergjente me dekret.
“Bota është në prag të një krize ekonomike. Hungaria duhet të qëndrojë jashtë kësaj lufte dhe duhet të mbrojë sigurinë financiare të familjeve. Kjo kërkon hapësirë për manovrim dhe veprim të menjëhershëm.
Qeveria, duke ushtruar të drejtën e saj sipas Kushtetutës , do të shpallë një emergjencë lufte nga mesnata sonte. Kjo gjithashtu i mundëson qeverisë të reagojë menjëherë dhe në të gjitha situatat për të mbrojtur familjet hungareze” tha Viktor Orban.
Qeverisë së Orbanit i duhet të përballet me pasojat e luftës në Ukrainë, inflacionin vjetor prej 9.5% dhe një deficit buxhetor që u rrit në tremujorin e parë për shkak të shpenzimeve parazgjedhore. Ai gjithashtu duhet të shmangë një ngadalësim të theksuar në ekonomi.
Partia nacionaliste e Orban Fidesz përsëri fitoi një shumicë prej dy të tretave në parlament në zgjedhjet e prillit duke tërhequr shpesh kritika nga Bashkimi Evropian dhe grupet e të drejtave mbi atë që ata thonë se po kontrollon balancat demokratike.
