Urimet për Bajram Begajn sonte kanë qenë të shumta për zgjedhjen në krye të shtetit, por nga opozita kanë munguar. Por jo nga të gjithë. Dy miq të tij ish-ushtarakë e kanë uruar duke dalë kundër linjës së partisë. I pari ka qenë ish-shefi i Shtabit të Përgjithshëm të Forcave të Armatosura, ish-deputeti i PD-së, Xhemal Gjunkshi.
“Suksese në misionin e Presidentit Shqipërisë, z Bajram Begaj. Është moment historik zgjedhja e një presidenti dhe karriera e tij në fushën e mbrojtjes më imponon respekt dhe vlerësim. Ushtarakët i përkasin kombit dhe i shërbejnë me nder të gjithë shqiptarëve.
Komentet dhe kritikat i përkasin politikës, partive. Unë dua dhe jam i bindur të besoj se Presidenti Begaj do ti shërbejë Shqipërisë dhe do të respektojë me rigorozitet ligjin dhe Kushtetutën” shkruan ai.
Ish-ministri teknik i PD, Dritan Demiraj gjithashtu ka dalë kundër bojkotit të opozitës në seancën për zgjedhjen e presidentit të ri duke vlerësuar figurën e Bajram Begajt.
“Zgjedhja e një ushtaraku në krye te shtetit, është një vendim dhe zgjedhje që na bën të gjithëve krenare. Portreti i ushtarakut është simboli i dashurisë për Atdheun, Detyrën dhe Kombin.
Presidentin Bajram Begaj e njoh personalisht për më shumë se dy dekada në Forcat e Armatosura dhe përveç të tjerave mbaj mend përkushtimin e tij maksimal ndaj pacienteve ushtarake, kolegeve dhe jo vetëm.
Me këtë rast i uroj suksese dhe mbarësi presidentit Begaj në detyrën më të larte si kreu i shtetit Shqiptar dhe si Komandant i Përgjithshëm i Forcave të Armatosura.
Nga ana tjetër mendoj se djegia e mandateve, bojkotimi dhe braktisja e çdo procesi institucional dhe detyrimi kushtetues nga ana e opozitës “perëndimore”, për të cilën është votuar për të qenë zëri dhe përfaqësuesi i qytetarëve opozitare në institucionin e Parlamentit Shqiptar me justifikime qesharake nuk tregon asgjë tjetër vetëm mungesë lidershipi dhe vizioni politik”, shkruan Demiraj.
