11 persona janë arrestuar mëngjesin e kësaj të diele në Itali, ku mes tyre ishin 6 shqiptarë dhe 5 italianë. Mediat italiane shkruajnë se personat janë arrestuar për prodhim dhe trafikim të lëndëve narkotike, si dhe mbajtje të armëve.
Hetimet kanë konstatuar se grupet kriminale kanë zhvendosur prodhimin e drogës nga Shqipëria në provincat e Barit dhe Foggia. Në operacion u sekuestruan dy plantacione, të rritura në serra, të përbëra nga mbi 8000 bimë marijuanë.
Hetimet e kryera në aksin Cerignola-Bisceglie-Bari-Oria kanë dokumentuar furnizimin në zonat Foggiano dhe Brindisi dhe transportin me rrugë tokësore (nëpërmjet korrierëve shqiptarë). Arrestimet u kryen në Pulia dhe Lombardi.
