“E ardhmja e Ballkanit është në BE. Shqipëria ka qëndruar pranë fqinjëve në kohë të vështira dhe jam i kënaqur që pritja ka mbaruar dhe jam i gëzuar që ky çast po zhvillohet në presidencën çeke.
BE do ju mbështesë në rrugëtimin tuaj”. Kështu u shpreh sot nga Brukseli Ministri i Punëve të Jashtme të Republikës së Çekisë, Jan Lipavský.
“Kjo është hera e katërt që më duhet të marr fjalën. Nuk dua të zgjatem, falenderoj nga zemra median që ka ardhur nga Shqipëria dhe këdo që ka qëndruar këtu për ta ndjekur këtë konferencë shtypi historike dhe po ia kaloj fjalën komisionerit” vijoi më tej Edi Rama.
Komisioneri i Bashkimit Europian për Zgjerimin dhe Fqinjësinë, Olivér Várhelyi kishte një mesazh për shqiptarët.
“Mesazhi im drejt qytetarëve të Shqipërisë është i thjeshtë, ne duam që ju të jeni pjesë e familjes europiane dhe kjo as nuk diskutohet.
Shqipëria mund të mbështetet te komisioni. Do të bëjmë cfarë është e mundur për të përshpejtur procesin” tha ai.
Olivér Várhelyi kërkoi edhe njëherë gjithëpërfshirje.
“Duhet konsensus mbarëkombëtarë në këtë rrugëtim për ta mundësuar këtë gjë, jo vetëm gjithëpërfshirëse, por edhe shteruese, pasi negociatat kanë natyrë transformuese.
Ndikimi do të jetë madhor, pozitiv, te shoqëria, ekonomia dhe do të sjellë të mira të menjëhershme për shqiptarët”.
