Ka nisur boshatisja e ambasadës së Iranit, pas afatit 24-orësh të vendosur nga kryeministri Edi Rama.
Mbi 70 persona që punojnë në këtë institucion, duhet të braktisin godinën. Në orët e paradites janë parë një numër i konsiderueshëm i tyre që largohen.
Largimi i ambasadës iraniane po bëhet për shkak të ndërprerjes së marrëdhënieve diplomatike me të.
Kryeministri Rama tha se qeveria së bashku me partnerët kanë vërtetuar me prova se regjimi i Teheranit qëndron pas sulmit kibernetik të 15 korrikut mbi shërbimet publike në Shqipëri.
Në orët e mbrëmjes së djeshme ka filluar edhe largimi i diplomatëve, ndërsa në ambientet e brendshme është parë që të ketë tym dhe flakë, ku mesa duket po digjen dokumentacione.
