Sot qeveria bëri goditjen e dytë. Ministri i Brendshëm Bledi Çuçi ishte në Farkë, ku njoftoi se është zbuluar një tjetër shtesë pa leje në një pallat në ndërtim.
Bëhet fjalë për 1200 m2, shtesa kati pa leje, tha ai.
“Kjo ndërtesa ka 1200 m2 jashtë lejes, shtesa kati. Subjektit do i lihen dy opsione, ta para-blejë me çmimin e tregut. Këto para do të shkojë në dispozicion të shpronësimeve.
Opsioni i dytë është që ta dhurojë, këtë volum, shtesat e kateve. Ose do i sekuestrohet” tha Çuçi.
Por kush biznesmen është ai që po e ndërton? Ministri nuk ia përmendi emrin.
Por rezulton se shtesat e kateve pa leje janë ndërtuar në pallatin në pronësi të biznesmenit Pëllumb Salillari.
Pëllumb Salillari është një biznesmen i njohur. Disa herë i denoncuar nga opozita. Një nga rastet ishte për rrugën e prishur në Borsh.
Gjithashtu ai u bë i njohur edhe për batutat dhe afrimitetin me kryeministrin Rama, që në një prej raste nuk nguroi ta puthte në ballë.
