Numri i të vdekurve nga shpërthimi i kamionit në urën e ngushticës së Kerçit (ose Ura e Krimesë ) ka shkuar në tre, sipas Komitetit Hetues Rus.
Sipas informacioneve të para, të vdekur janë drejtuesi i kamionit, i cili është identifikuar dhe dy pasagjerë të një veture që kalonte.
“Ata besohet të jenë pasagjerë në një makinë që ndodhej pranë kamionit kur shpërtheu.
Trupat e dy viktimave, një burri dhe një gruaje, janë nxjerrë nga uji dhe pritet identifikimi i tyre”, thuhet në një njoftim lidhur me këtë.
Pronari i kamionit dyshohet se ishte banor i provincës jugore Krasnodar të Rusisë. Në fakt, në shtëpinë e tij kanë nisur edhe kontrollet.
Ndërkohë, është shfaqur një video që dyshohet se tregon autoritetet ruse duke kontrolluar pjesën e poshtme të kamionit përpara se ta lejojnë atë të kalojë urën.
Kievi nuk e ka marrë zyrtarisht përgjegjësinë për shpërthimin në urën e Krimesë, por e ka treguar, natyrisht, hapur kënaqësinë e tij me këtë zhvillim.
Mykhailo Podoliak, këshilltar i presidencës ukrainase, theksoi përmes Twitter-it se ky është vetëm “fillimi”, pa thënë megjithatë drejtpërdrejt se Ukraina po merr përgjegjësinë.
“Gjithçka e paligjshme duhet të shkatërrohet, gjithçka e vjedhur duhet t’i kthehet Ukrainës, Rusia duhet të dëbohet nga gjithçka që zotëron” tha Podoliak.