Kreu i diplomacisë evropiane, Josep Borrell njoftoi sot se do të studiojë me partnerët e tij në OSBE, seanca e së cilës filloi në Lodz të Polonisë, “të gjitha mundësitë ligjore” me qëllim që Rusia të paguajë për shkatërrimin e Ukrainës.
“Ne kemi sekuestruar pothuajse 20 miliardë euro nga oligarkët dhe njerëzit që mbështesin Rusinë dhe ne kontrollojmë rreth 300 miliardë nga burimet financiare të bankës qendrore ruse,” tha ai.
“Këto para duhet të përdoren për të rindërtuar Ukrainën,” këmbënguli ai gjatë takimit ministror të Organizatës për Siguri dhe Bashkëpunim në Evropë (OSBE) në Lodz, Poloninë qendrore.
OSBE ka 57 anëtarë, duke përfshirë Rusinë dhe Ukrainën.
Varshava, e cila kryeson organizatën këtë vit, i mohoi Ministrit të Jashtëm rus Sergei Lavrov hyrjen në territorin e saj. Moska e denoncoi këtë vendim si “provokues”.
Rusia përfaqësohet në Lodz nga ambasadori i saj në OSBE.
Kreu i diplomacisë evropiane denoncoi sulmin e Rusisë kundër Ukrainës, duke e konsideruar atë shkelje të së drejtës ndërkombëtare dhe parimeve të OSBE-së.
“Rusia ka sjellë luftë në Evropë, ka minuar kartën e Kombeve të Bashkuara dhe ka dështuar të respektojë detyrimet e saj ndërkombëtare” , tha ai.
Borrell tha gjithashtu se Evropa dhe bota “kanë nevojë për një rend të ri sigurie në Evropë, pasi Rusia shkatërroi plotësisht atë që kishim”.
Ai njoftoi gjithashtu një propozim “që synon të mbështesë Gjykatën Penale Ndërkombëtare të Rusisë për krimet e luftës” në Ukrainë, një ide që “duhet të diskutohet dhe miratohet fillimisht nga vendet anëtare të Bashkimit Evropian dhe më pas nga Kombet e Bashkuara”.
