Shtëpia e Bardhë mohoi të hënën akuzën e Pekinit se Shtetet e Bashkuara kanë dërguar balona mbi Kinë për të kryer mbikëqyrje, teksa tensionet rreth pajisjeve të spiunazhit po rriten mes dy superfuqive.
“Çdo pretendim se qeveria amerikane operon me balona vëzhgimi është i pavërtetë”, tha zëdhënësja e Këshillit të Sigurisë Kombëtare Adrienne Watson në Twitter, duke shtuar se është Republika Popullore e Kinës “që ka një program të balonave të mbikqyrjes për mbledhjen e inteligjencës”.
Kina, më herët gjatë ditës tha se më shumë se 10 balona amerikane kanë fluturuar mbi hapësirën e saj të lartë ajrore gjatë vitit të kaluar, pa lejen e saj, pas akuzës së Uashingtonit se Pekini po operon një flotë balonash vëzhgimi në mbarë botën.
Pretendimi kinez vjen pasi SHBA-ja rrëzoi një balonë të dyshuar spiune kineze që kishte kaluar nga Alaska në Karolinën e Jugut, duke ndezur një krizë të re në marrëdhëniet dypalëshe që kanë arritur në nivelin më të ulët në dekada.
Zëdhënësi i Ministrisë së Jashtme kineze Wang Wenbin nuk dha detaje në lidhje me balonat e supozuara të SHBA-së.
“Është gjithashtu e zakonshme që balonat amerikane të hyjnë ilegalisht në hapësirën ajrore të vendeve të tjera”, tha Wang në një konferencë të përditshme. “Që nga viti i kaluar, balonat e SHBA-së në lartësi të mëdha kanë fluturuar ilegalisht mbi hapësirën ajrore të Kinës më shumë se 10 herë pa miratimin e autoriteteve kineze”, shtoi ai.
