Një varkë me 47 emigrantë që ishte nisur nga ujërat e Libisë drejt Italisë është mbytur. Këtë e bën me dije Organizata ‘Alarm Phone’, (OJQ e krijuar nga një rrjet i madh aktivistësh për të alarmuar shpëtimin në det), ku sqaron se në Itali ka rënë alarmi për orë të tëra por është vonuar shpëtimi.
“Shumë nga 47 personat në bord janë të zhdukur”, shkruan organizata ndërsa shton se janë mbytur dhjetëra persona që ndodheshin në varkë.
Raportohet se autoritetet italiane u kishin dhënë udhëzime anijeve tregtare të pranishme në zonë, por vëzhgimi zgjati vetëm 24 orë. Për këtë arsye Alarm Phone akuzon Italinë për ngjarjen tragjike.
“Nga 2.28 e datës 11 mars, autoritetet u informuan për urgjencën dhe situatën e rrezikshme. Autoritetet italiane vonuan qëllimisht shpëtimin, duke i lënë ata të vdisnin”, shkruan organizata në një postim në Twitter.
