Masa e sigurisë për kapitenin dhe 3 anëtarët e ekuipazhit të anijes “Queen Majeda” është ndryshuar nga Gjykata e Durrësit pasi u kapën me naftë të kontrabanduar në brigjet e Durrësit.
Më parë gjykata kishte vendosur arrest me burg për 4 nga pjesëtarët e ekuipazhit vendim i cili u ndryshoi pas 6 muajsh me “detyrim të qëndrimit në një vend të caktuar”.
Policia në kuadër të operacionit të koduar “Ring” arrestoi kapitenin e anijes, 54-vjeçarin Zuhair Alkwafi, 25-vjeçarin Muavid Ali Altabir, 43-vjeçarin Amad Abushala të tre nga Libia, si dhe 25-vjeçarin Badr Teezini nga Siria.
Prokuroria kërkoi të zëvendësohet masa e sigurimit “Arrest ne burg” me atë të “detyrimit të qëndrimit në një vend të caktuar”, konkretisht në territorin ku është ankoruar anija Queen Majeda, në portin e Durrësit.
Anija çisternë që vinte nga porti i Bengazit u kap nga antikontrabanda detare dhe policia kufitare.
Të arrestuarit akuzohen për “Kontrabandë me mallra për të cilat paguhet akcizë”, “Ruajtja apo depozitimi i mallrave kontrabandë” dhe “Kontrabanda e kapitenit, pilotit ose ekuipazhit”, të kryera në bashkëpunim.
Kjo masë është ndryshuar në mes të muajit mars, ndërsa hetimet vijojnë.
Në anije u sekuestruan 2275 ton naftë kontrabandë, me vlerë rreth 2.2 milionë dollarë, duke arrestuar 4 persona dhe proceduar në gjendje të lirë 6 të tjerë.