Nga Dylber Balla
Sot është një ditë vendimtare për PD-në e drejtuar nga Enkelejd Alibeaj pasi do të zyrtarizohen emrat për kandidatë për kryetar bashkie dhe formula si do të dalin në zgjedhje.
Vëmendja kryesore është e përqendruar te Tirana. Mbrëmjen e djeshme në kryesinë e PD-së u propozuan disa emra për Bashkinë Tiranë, mes tyre Jonila Godole dhe Roland Bejko.
“5Pyetjet.al” kontaktoi me zotin Bejko, i cili tha se këtë çështje do ta vendosë përfundimisht Kryesia, pasi të dëgjohet Kolegji i Kryetarëve.
“Nuk jam propozuar vetëm unë, por edhe Gaz Berdhi, Jorida Tabaku, Flutura Açka, Jonila Godole. Sot do ta ndajë kryesia pasi të dëgjohet dhe kolegji i kryetarëve” tha ai.
“5Pyetjet.al” kontaktoi edhe zonjën Godole, e cila tha se ishte surprizuar nga fakti që ishte propozuar edhe emri i saj për bashkinë e Tiranës.
“Normalisht që jam e surprizuar. Por do ta shohim çfarë vendimi do të merret”. A do të pranonte nëse në fund do t’i besoj asaj kandidimi me logon zyrtare të PD-së në Tiranë përballë Erion Veliajt dhe Belind Këlliçit?
“Nuk të kthej dot përgjigje tani” tha Godole për “5Pyetjet.al”. Sot në mesditë Enkelejd Alibeaj, kryetari i komanduar i PD-së ka mbledhur kolegjin e kryetarëve dhe në darkë vendimin final do ta marrë Kryesia.
