Kryeministri grek Kyriakos Mitsotakis nuk do të formojë qeverinë edhe pasi harta greke u ngjyros e gjitha blu. Ai nuk mundi të marrë shumicën dhe nuk do të tentojë për koalicion, por do të presë raundin e dytë të zgjedhjeve. Mitsotakis u shpreh se nuk janë kushtet për të krijuar kabinetin e ri.
“Konsideroj se zgjedhjet e djeshme ishin një hap progresiv. E konsideroj si zhvillim pozitiv rritjen e pjesëmarrjes, që pavarësisht kufizimeve votuan bashkëqytetarët jashtë vendit dhe rezultatet u dhanë në kohë rekord. Besoj se mesazhi i kutive të votimit ishte absolutisht i qartë, besoj se nuk ka asnjë kusht për formimin e qeverisë nga Kuvendi aktual.
Duhet të theksoj se nëse do të zbatohej sistemi proporcional i zgjeruar, ND do të kishte më shumë se 170 mandate. Besoj se vendi ka nevojë për një qeveri të qëndrueshme me një perspektivë 4-vjeçare. Sa më shpejt të mbyllet kjo çështje pezull, aq më mirë do të jetë për vendin”, tha Kyriakos Mitsotakis.
Në raundin e dytë partia që del e para por që nuk arrin të marrë 50+1%, që sipas të gjitha gjasave pa dyshim që do të jetë “Nea Demokracia” e kryeministrit aktual do të marrë një numër të caktuar mandatesh nga sistemi “PRIM” për të formuar e vetme qeverinë.
