Nuredin Dumani dhe Henrik Hoxhaj, dy të penduarit e drejtësisë janë shoqëruar sot nga burgu drejt Gjykatës së Posaçme për të dëshmuar në lidhje me vrasjen e Dorian Shkozës dhe Anxhelo Avdiajt në Durrës. Hoxha ka treguar se është paguar nga Dumani me 60 mijë euro për të kryer vrasjen e Shkozës.
“Nuredin Dumani më premtoi 60 mijë euro. Kisha 2 pistoleta, ndërsa Bitri një pistoletë me mulli, objektivi sipas Dumanit ishte Dorian Shkoza. Në atentat kam qëlluar me të dyja armët, edhe Bitri qëlloi njëherë me armën e tij.
Nga Dumani kam marrë vetëm 35 mijë euro, pjesën tjetër të parave e mori Elio Bitri. Me Nuredin Dumanin jam njohur 6 muaj para vrasjes së Dorian Shkozës dhe Anxhelo Avdiajt” mësohet se ka deklaruar Hoxhaj në dëshminë e tij. Pritet edhe dëshmia e Dumanit lidhur me vrasjet. Nuk përjashtohet edhe një ballafaqim i tyre.
