Të enjten e kaluar Kuvendi miratoi rritjen e pagave për më shumë se 130 mijë punonjës të administratës, por edhe institucioneve të pavarura, deputetëve dhe ministrave. Të hënën Presidenti Begaj që gjithashtu përfitoi rritje page e dekretoi ligjin.
Por pavarësisht se Parlamenti ka miratuar ligjin për rritjen e pagave për të gjitha kategoritë në administratën shtetërore, pagat e muajit Maj 2023 do të kalojnë siç janë pa ndryshimin me ligjin e ri. Kështu deklaroi sot ministrja e Financave Delina Ibrahimaj në një konferencë për shtyp duke sqaruar se kjo bëhet me qëllim deri në përgatitjen e plotë të dokumentacionit dhe për të mos shkaktuar vonesa në paga.
“Duke qenë se janë mbi 200 institucione të administratës qendrore të cilat preken nga këto vendime por janë dhe mbi 130 mijë të punësuar duke bashkuar këtu dhe të punësuarit në shëndetësi, në arsim, në fushën e sigurisë pagat e të cilëve u miratuan që në muajin Prill. Zbardhja e vendimeve dhe aplikimi i vendimeve merr një kohë më të gjatë.
Kjo është dhe arsyeja pse për të qenë më koherentë dhe për të shkaktuar sa më pak vonesa në marrjen e pagave ne u kemi kërkuar të gjitha institucioneve buxhetore të përgatisin dokumentacionin e nevojshëm me qëllim që pagat e muajit Maj në fazën e parë të kalojnë siç ishin para se të hynte në fuqi reforma.
Duke marrë në konsideratë këtu që disa prej institucioneve në fakt titullarët e institucioneve që preken nga ligji i cili kaloi në Parlament mund të aplikoheshin pagat, ne vendosëm që pagat në tërësi të kalojnë siç kanë qenë në muajin Maj dhe ndërkohë ne me zbardhjen e vendimeve do instruktojmë për dokumentacionin e nevojshëm me qëllim që shtesat mbi pagë të aplikohen qoftë për muajin Prill qoftë për muajin Maj” ta ajo.
