Në mbledhjen e Kryesisë së Partisë Demokratike të mbajtur me 6 qershor 2023, Kryesia vendosi hapjen e procesit zgjedhor dhe mbajtjen e zgjedhjeve për për Kryetarin e PD me datë 29 korrik 2023. Vendimi u miratua me 17 vota pro, 2 vota kundër dhe 3 abstenime.
Deputetet që janë njëkohësisht anëtarë të kryesisë kërkuan shtyrjen e garës, ndërsa anëtarët e tjerë të kryesisë u kërkuan këtyre të fundit llogari edhe pse nuk kanë qenë shumë aktiv në fushatë, kryesisht atë të Tiranës. Orët e fundit të mbledhjes u shoqëruan edhe me tensione dhe tone të larta.
Teksa anëtarët e kryesisë mbanin diskutimet e fundit, një grup militantësh të PD (mbështetës të Lulzim Bashës) u mblodhën jashtë, duke kërkuar vendim.
6 orë dhe debati vazhdon! Fati i zgjedhjeve në PD vendoset pas mesnatës
Gazment Bardhi, Saimir Korreshi, Helidon Bushati, Dashnor Sula, Lefter Geshtenja, Bledion Nallbati, Dhurata Çupi u larguan nga mbledhja më parë se të tjerët, rreth orës 1 të mesnatës. Gjatë largimit nga mbledhja, deputetët janë share dhe ofenduar nga militantët.
Vendimi i Kryesisë së PD-së
PËR ORGANIZMIN E PROCESIT ZGJEDHOR PËR KRYETAR TË PARTISË DEMOKRATIKE
Në mbështetje të pikës 6, të nenit 10, neneve 24,25,45, 46 dhe 53 të Statutit të PDSH-së, duke vlerësuar situatën e vështirë që kemi kaluar, situatën aktuale të strukturave të partisë dhe vakancat e krijuara ne disa nivele duke filluar nga Kryetari i PDSH e deri në bazë, bazuar në kërkesën e Kolegjit të Kryetarëve për nevojën emergjente për zhvillimin menjëherë të zgjedhjeve për Kryetarin e PDSH si dhe riorganizmit të plotë të partisë, Kryesia e Partisë në mbledhjen e datës 6 Qershor 2023
VENDOSI:
Fillimin e menjëhershëm të procesit të evidentimit të antarësisë, dhe organizimit të zgjedhjeve për kryetar të PDSH.
1. Në çdo degë të PD brenda datës 15 korrik kryhet procesi i plotë i evidentimit të antarëve me të drejtë vote sipas përcaktimeve të nenit 25 të statutit.
a. Kryetari i degës ngre grupin e punës të degës i cili ka për detyrë të kryejë evidentimin e antarëve me të drejtë vote;
b. Grupi i punës në degë bën evidentimin e antarësisë dhe strukturave në detyrë brenda datës 13 korrik.
c. Lista e përpiluar sipas formatit në aneksin 2 depozitohet pranë sekretariatit të PDSH.
Komisioni Zgjedhor përpilon listën kombëtare të antarësisë me të drejtë vote sipas përcaktimeve të nenit 25.
2. Organizimi i procesit për zgjedhjen e kryetarit të PDSH:
a. Procesi zgjedhor drejtohet nga Komisioni Zgjedhor i Partisë;
b. Pranë Komisionit Zgjedhor, secili kandidat paraqet kërkesën për kandidim brenda datës 20 Qershor 2023;
c. Fushata zgjedhore zhvillohet nga data 24 Qershor deri në datën 27 korrik 2023;
d. Zgjedhjet për kryetar të PDSH zhvillohen në datë 29 korrik 2023.
3. Kryesia e PDSH brenda datës 12 qershor 2023, cakton grupet e punës në nivel qarku që në bashkëpunim me deget mbikqyrin procesin e evidentimit te antarësisë;
4. Kuvendi i jashtzakonshëm statutor zhvillohet brenda muaji shtator 2023;
5. Ngarkohen Sekretari i Përgjithshëm, Sekretariati dhe Komisioni Zgjedhor për njoftimin dhe ndjekjen e zbatimit të këtij vendimi.
Ky vendim hyn në fuqi menjëherë.
