Kavajë/Vijon operacioni policor i koduar “Fati i lojërave”, për konstatimin dhe goditjen e organizimit të kundërligjshëm të lojërave të fatit, në subjektet tregtare në zonën bregdetare.
Organizonin prej rreth 3 muajsh, në lokalin ku punonin, në Golem, vënien e basteve sportive nëpërmjet celularëve, arrestohet në flagrancë 48-vjeçari dhe procedohet në gjendje të lirë, për shkak të moshës, një 17-vjeçar. Sekuestrohen 3 celularë, me faqe bastesh aktive në ta.
Specialistët për Hetimin e Krimeve të Komisariatit të Policisë Kavajë kanë intensifikuar kontrollet në subjektet tregtare në zonën bregdetare të rrethit, në kuadër të operacionit policor të koduar “Fati i lojërave”, për parandalimin, evidentimin dhe goditjen e rasteve të organizimit të lojërave të ndryshme të fatit, në kundërshtim me ligjin. Si rezultat, u konstatua një tjetër rast i kësaj veprimtarie, për të cilin u arrestua në flagrancë shtetasi:
-Elvis Mullaj, 48 vjeç, banues në Tiranë, si dhe u referuan materialet në Prokurori ku nisi procedimi në gjendje të lirë, për shkak të moshës, për një 17-vjeçar.
Të dy këta shtetas u kapën në flagrancë, në ambientet e lokalit ku punonin, në Golem, teksa vinin baste sportive, nëpërmjet disa celularëve. Nga veprimet hetimore të kryera për këtë rast, dyshohet se këta shtetas e kryenin këtë veprimtari të kundërligjshme, prej rreth 3 muajsh.
Në cilësinë e provës materiale, këtyre shtetasve iu sekuestruan 3 celularë që dyshohet se i shërbenin vënies së basteve. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
