Prokuroria e Posaçme kundër Krimit të Organizuar dhe Korrupsionit ka mbyllur hetimet dhe ka çuar në gjyq dosjen për ish-kryetarin e bashkisë Bulqizë, Lefter Alla dhe 10 ish-zyrtarëve të arrestuar dhe akuzuar për korrupsion me tenderat.
Ata dyshohet se kanë shkelur rregullat dhe procedurat ligjore në tenderin për ndërtimin e Ujësjellësit në Bulqizë me vlerë 3.2 miliardë Lekë.
Prokuroria e Posaçme ka siguruar përgjime ambientale që rëndojnë pozitat e ish-kryebashkiakut të Bulqizës Lefter Alla.
Përmes këtyre përgjimeve SPAK ka provuar se Alla ka pasur kontakte dhe komunikime me biznesmenin Aqif Konesha i kompanisë që kryente punimet për ujësjellësin e Bulqizës.
Madje, Alla, në shoqëri të Koneshës ka udhëtuar jashtë vendit me makinë, dyshohet në drejtim të Maqedonisë së Veriut.
Ish-zëvendëskryetarja e bashkisë Bulqizë, Enkeleda Lleshi, kishte dhënë më herët dorëheqje nga detyra pasi nuk donte të bëhej palë në firmosjen e tenderave, por është bindur që të rikthehet.
