Numri i të vdekurve në qytetin bregdetar Derna të Libisë ka shkuar në 11.300 ndërsa kërkimet vazhdojnë për gjetjen e të mbijetuarve pas përmbytjeve masive të shkaktuara nga çarja e dy digave pas shirave të dendura.
Marie el-Drese, sekretarja e përgjithshme e Gjysmëhënës së Kuqe të Libisë, tha për Associated Press se 10.100 njerëz të tjerë raportohen të zhdukur në qytetin mesdhetar.
Stuhia vdekjeprurëse në Derna mbrëmjen e së dielës, që u mori jetën mijëra njerëzve, vuri në pah dobësitë e vendit të pasur me naftë që është në konflikt që pas kryengritjes së vitit 2011 që rrëzoi diktatorin Moammar Gadafi.
Stuhia Daniel shkaktoi përmbytje vdekjeprurëse në komunitetet në të gjithë Libinë lindore, por më e goditura ishte Derna. Ndërsa stuhia goditi bregdetin, banorët thanë se dëgjuan shpërthime të forta kur dy diga jashtë qytetit u shembën.
Përmbytjet shpërthyen në Wadi Derna, një luginë që përshkon qytetin, duke u përplasur nëpër ndërtesa dhe duke i hedhur njerëzit në det.
