Ish-Presidenti Ilir Meta u shpreh se kërkesa e Edi Ramës që KFOR-i të marrë nën kontroll veriun e Kosovës është ide e Beogradit zyrtar për të rihapur çështjen e Kosovës brenda rezolutës 1244. Kërkoi që të dënohen veprimet e Serbisë dhe t’i qëndrohet marrëveshjes së Ohrit mes Prishtinës dhe Beogradit.
“Shqipëria duhet të kërkojë anëtarësimin e Kosovës në NATO, si garancinë absolute të sigurisë për Kosovën dhe rajonin. Përshëndes qëndrimin e fundit të KFOR-it që bën të qartë që ekskluzivitetin për rendin dhe sigurinë e ka policia e Kosovës.
Çdo përpjekje djallëzore, e hapur apo kamufluar që synon rivendosjen e veriut për KFOR-in është për të kaluar nga Republika e Kosovës tek Republika e KFOR-it. Kjo është ideja e Beogradit.
Synon që kjo çështje të transferohet në forumin e këshillit të sigurimit, ku pesë anëtarë, dy të përhershëm, Rusia dhe Kina, por edhe Brazili, Ekuadori dhe Mozambiku nuk e njohin Kosovën. Kjo kërkesë rihap çështjen e Kosovës brenda rezolutës 1244” tha ai.
