“Po vjen koha për mosbindje civile”. Kështu deklaroi sot Sali Berisha jashtë Kryesisë së Kuvendit pas mbledhjes me deputetët demokratë nën drejtimin e Gazment Bardhit.
Tha se opozita e ka “korrur” fitoren e parë, referuar faktit që shumica socialiste ka kaluar mbledhjet online.
Ndryshe nga Agron Duka, tha se nuk e pranon Lulzim Bashën në koalicion. “Unë qëndroj plotësisht tek vija e kuqe, cdo javë dalin të dhëna të tjera tronditëse.
Mos mendojë se hetimi i katër gazetarëve të BBC është i porositur nga Tirana. Basha është i pa kallur në rrafshin politik. Ai është dordolec, që e përdor Rama, por nuk tremb askënd”.
E respektoi mendimin e Dashamir Shehit që është kundër protestave. “Secili ka të drejtën e qëndrimit të tij”.
Kishte një koment për “veton” greke, sipas mediave për hapjen e kapitujve të negociatave. “Koment për këtë e kam bërë që në ditën e dytë të arrestimit të tij, ku unë kam parë filmimet e mediave, që ka qenë arrestim fund e krye politik.
Turp për institucionet e drejtësisë që pranuan për provë atë që kodi i procedurës penale e hedh poshtë. Prova e mbledhur me provokim nuk mund të merret për provë. Ai njeri u shpërblye 7 milionë Lekë për atë provokim”.
Nuk pranoi që të fliste gjatë kur u pyet për vendimin e Strasburgut që deklaroi se Shqipëria dështoi në hetimin për zbardhjen e vrasjes së Aleks Nikës.
“Nuk e kam lexuar, por sikur e di ti, nuk ka pasur dhe nuk mund të ketë kurrë pengesë hetimi nga Sali Berisha. Si është bërë hetimi, dosjet janë aty”.
Paralajmëroi ndryshime në qeverinë Rama. “Po bëhen gati riformatime të tjera të qeverisë, të cilat synojnë asgjë tjetër veçse konsolidimin e krimit në këtë qeveri.
Futja e Taulant Ballës ishte dorëzimi i rendit te krimi. Tani po synohet edhe futja e të tjerëve në mënyrë që krimi të saldohet” tha ai.
