Barcelona bëri gjithçka mirë në gjysmëfinalen e Super Kupës së Spanjës, duke mposhtur me rezultatin 2-0 Osasunan.
Në Riad gjithçka u vendos nga dy gola në pjesën e dytë, fillimisht Lewandowski i cili gjeti golin në ndeshjen e dytë radhazi, dhe më pas vulosi gjithçka talenti Yamal në minutën e 93’.
Katalanasit mbeten kështu në rrugën e tyre për të siguruar triumfin e 15-të të Superkupës Spanjolle, dhe në finalen e madhe do të gjejnë rivalët e tyre historik, Real Madrit.
Galactikos dhuruan një fitore spektakolare për tifozët e tyre me rezultatin 5-3 ndaj Atletico Madrid, dhe tani nuk ngelet veçse të presim për finalen e 14 janarit, ku “El Clasico” do të vendosë se kush do të jetë fituesi midis Barcelonës dhe Real Madrid.