Drejtuesi i Departamentit të Shëndetësisë në Partinë demokratike Ilir Alimehmeti ka denocuar shitjen dhe konsumimin e 13.2 ton akullore të kontaminuara me oksid etileni.
Alimehmeti tha se oksidi i etilenit është lëndë e klasifikuar ndërkombëtarisht si lëndë gjenotoksike dhe kancerogjene dhe është e ndaluar përdorimi i tij në ushqime që prej vitit 2011.
“Oksidi i etilenit është faktor risku për sëmundje kanceroze të ndryshme si limfoma, leucemi, kancer stomaku dhe kancer gjiri. Gjithashtu, oksidi i etilenit shkakton dëmtime të sistemit riprodhues, ndryshime gjenetike dhe dëmtime të sistemit nervor”, shprehet Alimehmeti.
Ai tha se për të zbuluar praninë e oksidit të etilenit nuk mund të mbështetemi vetëm mbi raportime ndërkombëtare por duhet të kryhen analizat sistematikisht.
“Autoriteti Kombëtar i Ushqimit është përgjegjës për mbikëqyrjen e sigurisë ushqimore në Shqipëri!”, theksoi Alimehmeti.
