Në malin Etna ka shpërthyer vullkani dhe si pasojë janë pezulluar fluturimet nga aeroporti i Catanias.
Fluturimet do të pezullohen deri në orën 18:00 pasdite, tha SAC, kompania e menaxhimit në aeroportin Catania-Fontanarossa.
Sipas Ansa, emetimi i hirit nga vullkani i Etnas dhe përhapja e një reje hiri vullkanike në atmosferë çoi në pezullimin e të gjitha fluturimeve që mbërrinin dhe niseshin nga aeroporti i Katanias.
Kjo është bërë e ditur nga Sac, kompania që administron aeroportin, duke saktësuar se është urdhëruar mbyllja e sektorëve B2 dhe B3. Operacionet do të rifillojnë kur fenomeni të pushojë dhe pasi hiri të jetë hequr nga pistat e fluturimit.
Pezullimi do të çojë në anulime dhe devijime drejt aeroporteve të tjera. Sac i ftoi pasagjerët të kontaktojnë linjën ajrore për më shumë informacion përpara se të shkojnë në aeroport.
Megjithatë, aktiviteti shpërthyes është në rënie, me një emetim të dobët të hirit që vazhdon nga krateret e majës.
