Qeveritë e Shqipërisë dhe Greqisë kanë rinisur bisedimet për një marrëveshje të mundshme për njohjen reciproke të pensioneve, duke synuar përmirësimin e kushteve të jetesës dhe sigurisë shoqërore për shtetasit e të dy vendeve.
Ambasadorja shqiptare në Athinë, Luela Hajdaraga, u prit nga ministrja greke e Punës dhe Çështjeve Sociale, Niki Kerameos, ku u diskutua mbi zgjidhjen e problematikave që prekin shërbimet sociale. Marrëveshja, e cila pritet të ndjekë një model të ngjashëm me atë të Italisë, do të përfitohet nga mbi 800,000 shtetas shqiptarë që jetojnë dhe punojnë në Greqi.
Ky hap ka për qëllim forcimin e marrëdhënieve bilaterale dhe përmirësimin e mbrojtjes sociale për komunitetin shqiptar në Greqi, duke thelluar bashkëpunimin ndërmjet dy vendeve.
