Kreu i Komisionit Qendror të Zgjedhjeve (KQZ), Ilirjan Celibashi, deklaroi se data 11 maj 2025 është më e përshtatshme për të zhvilluar zgjedhjet e ardhshme parlamentare, pasi krijon mundësinë për një përgatitje më të mirë të procesit zgjedhor. Ai theksoi se KQZ po shqyrton të gjitha mundësitë në lidhje me kohën për të siguruar një organizim sa më të mirë.
Ky koment erdhi pas një takimi të kreut të KQZ me Presidentin Bajram Begaj, i cili ka kërkuar konsultime me partitë politike për caktimin e datës së zgjedhjeve. Ndërkohë, Partia Demokratike ka shpërfillur ftesën e Presidentit për të marrë pjesë në konsultime, ndërsa Partia Socialiste dërgoi përfaqësuesit e saj në presidencë për të diskutuar mbi këtë çështje.
