Presidenti i Shteteve të Bashkuara Donald Trump ka deklaruar se Shtetet e Bashkuara janë shumë afër arritjes së një marrëveshjeje bërthamore me Iranin, dhe se Teherani ka shprehur gatishmërinë për të pranuar disa nga kushtet e propozuara.
Gjatë një turi në Gjirin Persik, Trump theksoi se negociatat po zhvillohen “në një nivel shumë serioz”, ndërsa i bëri thirrje Iranit të vazhdojë në këtë rrugë për të arritur një marrëveshje paqësore afatgjatë.
Bisedimet e fundit mes negociatorëve iranianë dhe amerikanë për të zgjidhur kontestet mbi programin bërthamor të Iranit u zhvilluan në Oman më 11 maj.
Zyrtarët e dy palëve kanë konfirmuar se do të vazhdojnë negociatat për të arritur një marrëveshje, megjithatë, Teherani ka këmbëngulur se do të vazhdojë pasurimin e uraniumit.
Sipas një raporti të AFP, Trump u shpreh: “Ne jemi në negociata shumë serioze me Iranin për paqe afatgjatë.”
Ndërkohë, të dy palët janë të angazhuar në diplomaci për të zgjidhur mosmarrëveshjet bërthamore që janë në zhvillim prej dekadash. Sidoqoftë ata mbeten të ndarë në disa pika kyçe të diskutimit, të cilat mund të bëhen pengesë për të arritur një marrëveshje përfundimtare, duke shmangur veprimet ushtarake. Sipas Reuters negociatat më të fundit kanë përfunduar në Oman, me planifikime për bisedime të mëtejshme në të ardhmen.
