Lëvizja palestineze Hamas ka deklaruar se ka pranuar një propozim të ri për armëpushim të ndërmjetësuar nga i dërguari i posaçëm amerikan për Lindjen e Mesme, Steve Uitkoff, përfaqësues i Presidentit të SHBA-së, Donald Trump. Sipas një deklarate zyrtare, ky plan synon të vendosë një armëpushim të përhershëm, tërheqjen e forcave izraelite nga Rripi i Gazës dhe lehtësimin e aksesit për ndihmat humanitare pa pengesa.
Në kuadër të marrëveshjes së propozuar, Hamasi është i gatshëm të lirojë 10 pengje të gjalla dhe të dorëzojë trupat e 18 të tjerëve në këmbim të lirimit të një numri të caktuar të të burgosurve palestinezë të mbajtur në burgjet izraelite.
“Hamasi ka paraqitur përgjigjen e tij zyrtare përmes ndërmjetësve lidhur me planin e fundit amerikan,” thuhet në njoftimin e lëvizjes, duke theksuar se vendimi u mor pas konsultimeve të gjera brenda grupeve palestineze.
Edhe pse Hamasi nuk ka bërë publike ndonjë kërkesë specifike për ndryshime në tekstin e marrëveshjes, burime palestineze i thanë agjencisë Reuters se janë propozuar disa modifikime. Megjithatë, përgjigjja e organizatës konsiderohet pozitive në thelb.
Nga ana tjetër, qeveria izraelite nuk ka dhënë ende një reagim zyrtar. Mediat izraelite kanë raportuar më herët këtë javë se Kryeministri Benjamin Netanyahu i ka informuar familjet e pengjeve se Izraeli ka pranuar propozimin amerikan, por kjo nuk është konfirmuar nga ndonjë deklaratë qeveritare.
Bisedimet për armëpushim kanë qenë të vështira për shkak të qëndrimeve kontradiktore të palëve. Izraeli kërkon dorëzimin e plotë të armëve nga Hamasi dhe lirimin e të gjithë pengjeve të mbetura në Gaza, ndërsa Hamasi kërkon një fund të qartë të konfliktit dhe tërheqjen e forcave izraelite nga territori.
