Të paktën 50 persona kanë humbur jetën nga shembja e një miniere ari në shkretëtirën Howaid, në shtetin e lumit Nil në verilindje të Sudanit, raportojnë mediat lokale.
Sipas dëshmitarëve, sasi të mëdha rëre dhe shkëmbinjsh u shembën mbi minatorët, duke i zënë poshtë gjatë punës. Mungesa e pajisjeve të rënda dhe e ekipeve të specializuara ka penguar përpjekjet e shpëtimit.
Ngjarja vjen vetëm dy muaj pas një tjetër shembjeje në të njëjtin vend, e cila shkaktoi lëndime. Tragjedia ka rikthyer kritikat ndaj autoriteteve për mungesë kontrolli, kushte të rrezikshme pune dhe mungesë sigurie në minierat artizanale të vendit.
