Presidenti amerikan Donald Trump ka nënshkruar një deklaratë fatkeqësie për Qarkun Kerr të Teksasit, pas përmbytjeve shkatërruese që kanë marrë jetën e mbi 60 personave, duke përfshirë dhjetëra fëmijë.
Në një postim në rrjetin social Truth Social, Trump tha se ky vendim do të mundësojë që ekipet e emergjencës të kenë burimet e nevojshme për t’u ardhur në ndihmë banorëve të prekur.
“Këto familje po përjetojnë një tragjedi të madhe. Administrata jonë po punon ngushtë me udhëheqësit lokalë për të siguruar ndihmën e nevojshme,” deklaroi presidenti.
Sekretarja e Sigurisë Kombëtare, Kristi Noem, ishte në terren bashkë me Guvernatorin Greg Abbott, duke ndihmuar në koordinimin e ndërhyrjeve për shpëtimin dhe rikuperimin.
Sipas autoriteteve, numri i viktimave në Qarkun Kerr është 59, përfshirë 21 fëmijë, ndërsa gjithë shteti po përballet me paralajmërime të vazhdueshme për përmbytje.
Shërbimi Kombëtar i Motit paralajmëron për rreziqe të larta nga përmbytjet në zonat qendrore të Teksasit, ndërsa operacionet e kërkim-shpëtimit vijojnë për të gjetur personat e zhdukur.
