Presidenti i Shteteve të Bashkuara, Donald Trump, ka njoftuar vendosjen e tarifave doganore prej 25% mbi importet nga Japonia dhe Koreja e Jugut. Vendimi u bë i ditur përmes dy letrave zyrtare që ai publikoi në platformën Truth Social, të adresuara personalisht liderëve të dy vendeve aziatike.
Trump ka vendosur afat deri më 9 korrik për të arritur marrëveshje të reja tregtare, pasi në atë datë skadon pezullimi i përkohshëm i tarifave reciproke që ishte në fuqi që nga prilli.
Ai gjithashtu nuk përjashton mundësinë që të ndërmarrë veprime të ngjashme edhe ndaj vendeve të tjera. Trump paralajmëron se po shqyrton dërgimin e letrave të ngjashme në drejtim të partnerëve të tjerë tregtarë të SHBA.
