Presidenti francez Emmanuel Macron po përgatitet të emërojë kryeministrin e tij të pestë në më pak se dy vjet pas dorëheqjes së François Bayrou i cili u largua pas humbjes në mocionin e mosbesimit në parlament për shkak të planeve jopopullore të shtrëngimit të buxhetit.
Macron ka përjashtuar idenë e zgjedhjeve të parakohshme, duke paralajmëruar se do të emërojë një kryeministër të ri brenda pak ditësh i cili do të përballet me sfidën e vështirë për të bashkuar parlamentin dhe miratuar buxhetin e vitit të ardhshëm.
Në media po përfliten emra si ministri i Mbrojtjes Sébastien Lecornu dhe ministri i Drejtësisë Gérald Darmanin.
Ndërkohë, opozita, përfshirë socialistët dhe ekstremin e djathtë, kërkon ndryshime më radikale, duke nxitur zgjedhje të parakohshme.
Franca gjithashtu përgatitet për protesta të mëdha antiqeveritare të organizuara në mediat sociale.
